Медицина қызметкері күні қарсаңында ҚР ПІБ Медициналық орталық ауруханасының қызметкерлері күнделікті еңбек ырғағын спорттық серпінмен ұштастырып, «Денсаулық жолында» жарысына қатысты. 3,8 шақырымдық қашықтықты еңсерген ақ халаттылар денсаулыққа деген жауапкершілік ең алдымен өзіңнен басталатынын тағы бір мәрте дәлелдеді.
Күн сайын пациенттердің саулығын сақтауға және өмір сапасын жақсартуға үлес қосып жүрген медицина мамандары үшін өз денсаулығына да ұқыптылықпен қарау маңызды. Осы тұрғыдан алғанда жарыс жай ғана спорттық шара емес, тұрақты қозғалыстың, белсенді өмір салтының және өз денсаулығына саналы көзқарастың маңызын насихаттайтын игі бастама болды.
Жүгіру жолына дәрігерлер, мейіргерлер, түрлі бөлімшелердің мамандары мен қызметкерлері шықты. Оларды ортақ мақсат, көтеріңкі көңіл күй және салауатты өмір салтын ұстануға деген ұмтылыс біріктірді. Бұл құндылықтарды олар күнделікті кәсіби қызметінде де дәріптеп келеді.
Жарыс медицина қызметкерлері үшін денсаулыққа қамқорлық кәсіби міндет қана емес, өмір салтының ажырамас бөлігі екенін тағы бір мәрте айқындады. Олар пациенттердің саулығын сақтауға атсалысып қана қоймай, өз үлгілері арқылы дене белсенділігінің, аурудың алдын алудың және денсаулыққа жауапкершілікпен қараудың маңызын көрсетіп келеді.
Іс-шара бірлік пен өзара қолдау рухында өтті. Жарыс қатысушыларға сергектік сыйлап, жағымды эмоциялар тарту етті әрі әріптестердің бейресми жағдайда бас қосып, өзара қарым-қатынасты нығайтуына мүмкіндік берді.
